28‏/09‏/2008

دحان و منظمة ( لا للدح ) العالمية .

وكالات الأنباء العالمية / القاهرة :

أخيرا أعزائى المتابعين فى كل أنحاء العالم ، خرج دحان إلى وسائل الإعلام وقرر منحها وقتا ضخما - 13 دقيقة و27 ثانية - من وقت دحه العظيم ، ليقوم فيها بعمل مؤتمر صحفى يرد فيه على منظمة ( لا للدح ) العالمية ، حيث قامت هذه المنظمة بتجميع أكثر من 2 مليار توقيع حول العالم ، يوقعون جميعا على طلب عاجل إلى مجلس الأمن الدولى لكى بتخذ كافة الإجراءات اللازمة لإنقاذ الجنس البشرى من خطر الدح عليه ، وبالأخص من أكبر مصادر هذا الخطر المدمر ، ألا وهو دحان !! .
وقد أكدت المنظمة أنها استشارت الكثير من العلماء من كافة المجالات ، جميعا على هذا الخطر الرهيب الذى يواجه البشرية من جراء الدح ، الذى قضى على براءة الأطفال وجعلهم لا يفعلون شيئا فى حياتهم سوى طحن المناهج ، دون ممارسة أي هوايات أو أي شئ على الإطلاق سوى الدح الذى لا ينتهى بالطبع ، بل إن الكثير منهم قد أصبحوا لا يعرفون آباءهم وأمهاتهم لأنهم لا يرون أمامهم غير كتب الدح فقط ، وليس عندهم وقت للجلوس مع آبائهم وامهاتهم ! ، إلا أن جهود المنظمة تفشل دائما فى القضاء على الدح ، بسبب وجود دحان ، الذى يمثل مصدر الإلهام الدحى للكثيرين ، والذين يرونه الأب الروحى للدحيحة فى كل زمان ومكان ، و أكدت المنظمة أنها ستقضى على الدح فى غضون 3 أيام ، بشرط بسيط : هو أن يظهر دحان على شاشات العالم وهو يعلن براءته من الدح ، ويقوم بممارسة بعض الألعاب أمام الأطفال من كل أنحاء العالم ، عندها ستهتز أسطورة الدح المتمثلة فى دحان ، وتنهار مقاومة الدحيحة ويتركون الدح ، وتتخلص الحضارة البشرية من خطر الدح  !
وفى المؤتمر الصحفى أعلن دحان 10 شروط بسيطة جدا جدا جدا ، لكى يتوقف عن الدح وهذه الشروط - البسيطة - هي :
1 : أن يظهر صلاح الدين الأيوبى و يقول لدحان : بطل دح يا دحو يا حبيبى !
2 : أن ينمو الشعر فى باطن كف قرد أرمل وأحول ومبتور اليدين !
3 : أن تتوحد مصر والمكسيك فى دولة واحدة ، وأن يتم بناء منزل لدحان على الحدود بين البلدين ، بحيث يكون نصفه فى مصر والنص التانى فى المكسيك !
4 : أن تعلن اسرائيل عن تفكيكها لنفسها وإسلام مواطنيها كلهم وإعادة الفلسطينيين لأرضهم !
5 : أن تخترع جيبوتى سفينة فضاء قادرة على الدوران حول الأرض 47 لفة بدون إعادة شحن بالوقود !
6 : أن يظهر الرئيس الأمريكى والفرنسى ورئيس الوزراء الموزمبيقى فى كافة تلفزيونات العالم وهم يلعبون ( صلح ) ويسبون بعضهم بأقذع الشتائم الممكنة .
7 : أن يتم انتخاب فيفى عبده لرئاسة وزراء بريطانيا وأن تقوم ملكة بريطانيا بالرقص مكانها فى النادى الليلى بتاعها !
8 : أن يفوز الزمالك بالدورى المصرى 17 عاما متتالية وأن يهبط الهلى لدورى الدرجة الرابعة ويتم شطبه من قائمة انحاد الكورة !
9 : أن تقوم دولة سان مارينو ( تقع داخل أراضى إيطاليا و عدد سكانها 30 ألف )  بإعلان الحرب على الصين والهند ( عدد سكانهما 2.5 مليار نسمة ) ولا تنتهى الحرب إلا باحتلالها لعاصمتيهما ، وأن يستمر الاستعمار السان مارينى للصين والهند قرنين !!
10 : أن يتوحد العرب ويكفوا  عن إلقاء الزبالة فى الشارع وسب بعضهم بأقذر الشتائم !!

وردت المنظمة على ماقاله محان بأن أعلنت أنها ستتوقف عن إضاعة أنوالها وجهود الناس وأعصابهم فى عمل خسران ! ، وأكدت استسلامها الفوري لدحان وأنها ستةجه اهتمامها إلى مشروعات أكثر احتمالا فى التحقق ، مثل مشروع ( آيس كريم ) الفضائى < وهو المشؤوع الفضائى الذى يتمنى العاملون فيه أن يتمكنوا من إرسال 18 رائد فضاء إلى قلب الشمس لتناول الآيس كريم دون أن يسيح الآيس كريم لمدة يومان !!                                انتهى التقرير وألف مبروك للدحيحة !!

24‏/09‏/2008

المساجد وحرامية الجزم !

الصراحة أنا مش عارف أعبر عن الغيظ اللى أنا شعرت بيه لما اتسرقت جزمة واحد من المصلين فى صلاة التراويح ، بجد أنا اتضايقت جدا لأن الحرامى - مهما كان فقير - ما عملش احترام لبيت الله ، ولا لشهر رمضان الكريم ، وكثرة السرقات اللى زي ديه للأسف إشارة مرعبة إلى ما فعله الفقر بناس كتير لدرجة تضطرهم ينتهكوا حرمة بيت الله أطهر مكان فى أطهر شهر ، ويسرقوا حاجة إخوانهم المسلمين أثناء الصلاة ، فربنا يستر !! ، المهم أنا فكرت فى كام طريقة - بسيطة جدا جدا جدا - للتغلب على هذه الظاهرة ، وتوصلت بالفعل لــ 10 طرق هعرضها عليكم وياريت لو حد عنده طرق حلوة تانى يقوللى ! ، والطرق هى :
@@@@@@@@@@@@@@@@@@@@@@@@@@@@@@@@@@@@@@@@@@@@@
1 : أن تضع حذاءك جنب أي حذاء غالى وملفت للنظر بحيث الحرامى ينجذب ليه ويسيب جزمتك !1 ( أما لو الحرامي قرر ياخد الاتنين فعليكبالطرق التانية ! ) .
2 : أن تربط فى حذاءك خيط رفيع جدا - و فى نفس الوقت قوي - ، لا يكاد يرى بالعين المجردة وتربط طرف الخيط التانى فى نفسك ، بحيث إذا الحرامى حب ياخد الجزمة ، تحس انت علطول وتروح تطحنه و تولع فيه ، لكن يعيب الطريقة ديه إنها هتسبب إن باقى المصلين هيصابوا بكسور وكدمات من كترة الكعبلة فى اليلك ، ويمكن سيادتك تبقى زيهم لو واحد مليان شوية اكعبل فى الخيط !
3 : أن تضع فى حذاءك جهاز تتبع ، ويكون معك رادار يظهر عليه مكان الحذاء ( عن طريق جهاز التتبع ) بحيث إذا تغيرت إحداثيات موقع الجزمة ، فالجهاز هيدى إنذار ينبهك إن الجزمة اتحركت و يحددلك مكانها فين ! ( التكلفة بسيطة جدا بتاع 30.000 دولار ! )
4 : إنك تضع جهاز تتبع برضه ، بس المره ديه يكون متصل بمدفع ليزري بيدور فى الفضاء حوالين الأرض ، ويكون مزود بمعلومات دقيقة عن شكل الحذاء ومقاسه وكل حاجة  عنه وعن سيادتك ، ولما توصل إشارة للمدفع إن شخص غريب هو اللى لابس الجهاز ، هيقوم المدفع بضربه بأشعته ويحوله لرماد من غير مايصيب الجزمة لأي ضرر !! ( الطريقة ديه مكلفة حبتين ، وعيبها إنها عنيفة إلى حد ما )
5 : تؤجر بودى جارد يحرسلك الشوز بتاع سيادتك على ماتخلص صلاه ، بس الخوف إنه هو نفسه يطلع حرامى !
6 : إنك تعمل حوالين الجزمة مجال كهرومغناطيسى  قوى يمنع أي حد - ولو الجن الأزرق والبمبى - من الاقتراب من الجزمة ، والجهاز اللى هيعمل المجال ده هيعمله بتاع 2 ولا 3 مليون بس !!( بس كله يهون فى سبيل الحفاظ على جزمتك ! )
7 : إنك توصل الجزمة بقنبلة غاز يسبب فقدان الوعى ، والقنبلة متصلة بحاسوب دقيق مزود ببياناتك ، فلما يحس إن شخص غيرك هى اللى ماسك الجزمة ، هيفجر القنبلة ، فالحرامى يفقد الوعى !
8 : إنك تطلى حذاءك بالمادة اللى أمريكا داهنه بيها المقاتلات الشبح عشان تختفى عن الرادار ، وتيلط على الجزمة ضوء قوى ، هيتفاعل مع الماده ديه ، فيخفى الجزمة فالحرامى مايشوفهاش ( وديه الطريقة اللى أنا بفضلها !! )
9 : إنك تركز كاميرا على الجزمة ، والكاميرا مزودة بشاشة عرض محطوطة فى الجدار اللى فى وشك فى المسجد ، بحيث لو حد قرب من الجزمة تشوفه وتعمل اللازم .
10 : طريقة عبقرية جدا ، جاتلى بعد تفكير أيام ................ إنك تحط الجزمة بتاعتك قدامك فما حدش يقدر ياخدها !! .
@@@@@@@@@@@@@@@@@@@@@@@@@@@@@@@@@@@@@@@@@@@@@

10‏/09‏/2008

يحكى أن !! .............. الدويقة !!

يحكى أنه فى قديم الزمان ، وفى سالف العصر والأوان ، كانت هناك دولة غريبة الأطوار ، كان يحدث بها أشياء عجيبة تفوق الخيال ، وكانت هذه الدولة - الشر بره وبعيد - يشق منتصف أرضها نهر كانوا يعبدوه ويسموه الإله حابى ويقتلوا اللى يرمى فيه فتفوتة وساخة ، وبعدها بشوية قلبوه مقلب زباله - شوف التناقض .... بلد تعبانه ، لكن احنا فى السليم ! - وكانت مساحة البلد ديه مليون كم 2 وشعبها كان طيب وفى حاله وماشى مع الرايجة ومابيقولش لأ - مش زينا كده شجعان وجسورين - ، ومن أمثلة الحاجات الغريبة اللى كانت بتحصل فى البلد الغريبة ديه إن الأسعار ارتفعت 4 و 5 أضعافها فى كام سنة قليلين ومع ذلك شعبها ما عملش حاجة ولا هش ولا نش - تصور ياأخى!!!!!!!!   - ، ولا التقيلة بقى !! ، شبابها مش لا قيين حاجة ياكلوها وقاعدين جنب أمهم فى البيت من غير وظائف وهاتك يا انحراف وبانجو وحشيش و ..و .. و .. ومع ذلك الحكومة ولا هى سائلة عنهم .
 لأ وخد ديه كمان ، كان فيه رجل أعمال فيها - سامع واحد ناصح بيلسن وبيقول إزاى رجل أعمال فى سالف العصر والأوان ؟! ، خلاص ماتزعلش يا سيدى خليها شهبندر التجار - المهم راجل الأعمال اقترض من البنك مليار دولار - احم ... قصدى دينار - بضمان العربية بتاعته - قصدى الناقة بتاعته - وبعدها خلع على سويسرا - قصدى بلاد الفرنجة - ، وطلعلهم لسانه وما حدش عرف ياخد منه مليم !! - بلدان غريبة بجد ، الحمد لله إن الحاجات ديه ما بتحصلش عندنا خااااااااااااااااااااالص - .
ولا خد ديه كمان ، البلد ديه فيها كل واحد ماسك سلطة ( بضم السين وتسكين اللام )  بيطلع روح اللى خلفوا أم اللى خلفوا أم اللى خلفوا أم اللى جابوا الناس اللى بيحكمهم ، وبينفرد بالرأى وماحدش بيعرف يحاسبه على التقصير حتى لو خربها وقعد على تلها لأ والكبيرة إنه -والعياذ بالله والشر بره وبعيد ! - ما بينتخبوش الحاكم بتاعهم ولو حصلت انتخابات بتبقى نتيجتها معروفة من قبل بدايتها ( يا عينى عليهم معندهمش مناخ ديموقراطى سليم زي اللى عندنا ، وما عندهمش خطط خمسية فاعلة ولا لجان منبثقة و لا حرية تعبير و فكر ونشر مفتوحة على مصراعيها زي ما هى عندنا !!) .
لأ وكل اللى فات ده كوم ، واللى جايه ديه كوم تانى ، كان فيها منطقة عشوائية مبنية على الجبل اسمها الدويقة - تشابه أسماء غريب مع منطقة الدويقة المتقدمة علميا وتكنولوجيا عندنا هنا - وفى يوم من الأيام صحيوا سكانها من النوم ولقوا بيوتهم بقت مدفونه تحت الأرض ، فقالوا يكلموا إصحابهم فى الموبايل يسألوهم عن الزلزال اللى حصل - عدى موضوع الموبايل ده معلش - ، فردوا إصحابهم وقالولهم إن المجارى اللى بتترمى على الجبل أكلت صخور الجبل وخلتها تنهار بيهم ، وفى الآخر فطسوا وماتوا تحت الأنقاض ( لكن السيد المسئول الشديد وعد بخيمة لكل متضرر وكام ألف جنيه - قصدى صرة من الدنانير - ووعد بتشكيل لجنة هندسية لمعرفة المتسببين فى هذه الكارثة على أن تنهى عملها قبل ما القرن يكون عدى عشان الإنجاز )
ديه كانت قصة الدولة اللى كانت فى قديم الزمان وسالف العصر والأوان ، واللى ماتشبهناش فى أي حاجة أبدا أبدا يامان !!

09‏/09‏/2008

هل ذا ؟! .............. من تأليفى

هل ذا يكف عن الإفساد عادينا **** أم هل نعود إلى أمجاد ماضينـــــــــــــا

فالذل حطمنا والليل يغشانا **** والظلم أغرق أحزانا ليالينـــــــــــــــــــــــا

يا دهر يامن شهدت المجد منبلجا*** فى أرضنا والضياء الحق هادينـــــــــا

ماذا تقول وشمس الحق قد أفلت *** كأنها لم تـُنـِر يوما روابينــــــــــــــــــــا

جفت بحور الهدى والعقل فى عـَجَبٍ *** كأنها لم تزُر يوما شواطينـــــــــــا

تلك العقول التى بالأمس قد فطنت *** زالت وصارت صنوف الجهل تهدينا

والعلم أضحى غريبا حائرا وجلا *** كأنه لم يزر من قبل ُ وادينــــــــــــــا

منابعه ْ فى صحارى الجهل قد جفت *** كأنه لم يكن كالنهر يروينــــــــــــا

أين ابنُ رشد ٍ أو الرازي ُ أو جابر ْ *** أو الغزالي ُ والكندي ُ أو سينـــــــا

أو غيرهم فى مروج العلم من زرعوا *** بستان َ تاريخنا زهرا رياحينـــا

كل الشعوب به ترقى وتلقانا ***** عن دربه الحق قد حــِدْنــا وأقصينـــــا 

فهل نعود لدرب العلم أم نبقى ***  للجهل أسرى وبعد الناس تالينـــــــــــــا

لكم أتوق إلى يوم  ٍ أرى بلدى *** منارة العلم إبداعا وتمكينـــــــ،ــــــــــــا

فهل سيأتى صباح مشرق صاف ٍ *** تكون أرضى كما ترجو أمانينـا ؟!! 





راجل جدع ( جداااااااااااااااا ) !!

الانتخابات الأمريكية ..... كله محصل بعضه !!

مبادرة السلام والكرامة العربية !!

08‏/09‏/2008

خماسية مصر ............ من تأليفى

%%%%%%%%%%%%%%%%%%%%%%%%%%%%%%%

يامصر يامن سَمَتْ والناس تمتهنُ  ****** يا مصر أنت ِ الحمى والعز والسكن ُ

ياأرض من قد بنوا بالأمس نهضتـَنا ***** شادوا صروح العلا للحق مُـرْتــَكــن ُ

كان الظلام يعم الكون َ أكملــــــَــه ُ ***** والعلم فى أرضها تزهو به المــــــدن ُ

قادن شعوب الدنا للنور قاطبــــــــة ً **** بحضارة قد سنا من نورها الزمـــــــن ُ

والبرُ من طبعها والجود شيمتـــــها ***** والعفو والقدرة العلياء تقتــــــــــــــرن ُ

                                %%%%%%%%%%%

أبناؤها فى فنون المجد قد برعــــوا **** فأذهلوا الكون من إبداع ما صنعـــــــوا

قد حققوا فى قديم الدهر مفخـــَــرة ً **** أضحت مثالا له الإبداع ُ متبـــــــــِـــــعُ فى الجد قد أبحروا لم يرتخــوا أبدا **** تنزهوا عن قشور اللغو فارتفعـــــــــوا

شبوا على البأس والإصرار والخـُلـُق ِ ** ومقولة ِ الحق إذ دوما بع صدعــــــــوا

كانوا مثالا لبر السلم إن ودعــــــوا **** وحين حربٍ ترى الأعداءَ ترتـــــــــدع ُ

                              %%%%%%%%%%%

فأين ذا الماضى العظيم ِ الآنـــــــا **** وأين ماقد مضى من مجد دنيانـــــــــــا ؟!

أبعد أن قد سمت بالأمس مصرُ وأن *** تقدمت ركب َ من فى الأرض ِ أزمانــا

وبعد أن كان فيها الخير أجمعــــُه **** وبعد أن ثبتت للعــــــــــــز أركانــــــــا

فإذ بها أصبحت للذل موطنــــِــه ِ **** وأصبحت لبذور الشوك بستانـــــــــــــا

وإذ بها فى دروب الجهل قد تاهت *** ضاع الرشاد وصار الزيغ ألوانـــــــــــا

                             %%%%%%%%%%%

أهذه مصر ُ أرضُ العز والكــرم ِ *** أبعد مجد ٍ سما بالأمس تنعـــــــــــــــــدم ِ

ضاعت بها سنن الفضائل بعدمـا **** كانت بأمس ٍ منار الدين ِ والقيــــــــــــم ِ

أهذه مصر حصن العـُرْب ِمن كانت ** ملاذ من يرتجى من حسن ِ مـُعـْتصــــم ِ

ترى بنيها أسود الأمس قد وهنـــوا *** تذيلوا – إذ أ ُذِلوا – موكب َ الأمــــــــم ِ

هانت كرامَتُهُم والعلم خاصمهُـــم ْ *** فزال نور الهدى من معقل ِ الظــُلــــَـــم ِ

                            %%%%%%%%%%%

حزنى عليك ِ يفوق الوصفَ يامصرُ ** إذ هزنى أن يبدد َ خيرَك ِ الشــــــــــــر ُ

أقسمت أنى سأبذلُ وُسع َما أسـَــــع ُ ** لكي يزول بمصر َ الذل ُ والقــَهــْـــــــر ُ

لا لن أكون بصيد ٍ للتراخــــــى أو ْ ** أن أكتفى بالصياح يهزنى الشعــــــــــر ُ

لكن سأجعل نفسى فى الوغى سيفا *** به ستقضى على أعدائها مصـــــــــــر ُ

سيف َ العدالة والإصرار والعلـْــم ِ *** بنصله يــُسْتعاد ُ المجد ُ والفخــْــــــــرُ

%%%%%%%%%%%%%%%%%%%%%%%%%%%%%%%

 

07‏/09‏/2008

تطور الموضة !! ربنا يستر !

حكم الغناء والموسيقى كما بينته دار الإفتاء المصرية .

المسلسل5679
الموضوعحكم الغناء والموسيقى والأناشيد الإسلامية
التاريخ19/11/2005

الســــؤال
اطلعنا على الطلب المقيد برقم 2908 لسنة 2005م المتضمن:
· السؤال الأول : ما حكم الاستماع إلى الموسيقى؟ وما هو الحلال والحرام منها؟ وما حكم الغناء وما ضوابطه؟ وما حكم الاستماع إلى الأناشيد الإسلامية سواء أكانت بدف أم لا؟

الـجـــواب
أمانة الفتوى
الأغـاني والموسيقى منها ما هو مباحٌ سماعُه ومنها ما هو محرم؛ وذلك لأن الغناء كلام؛ حَسَنُه حَسَن وقبيحه قبيح.
فالموسيقى والغناء المباح: ما كان دينيًّا أو وطنيًّا أو كان إظهارًا للسرور والفرح في الأعياد والمناسبات، مع مراعاة عدم اختلاط الرجال بالنساء، وأن تكون الأغاني خالية من الفحش والفجور وألا تشمل على محرم كالخمر والخلاعة، وألا يكون محركًا للغرائز أو مثيرًا للشهوات، وأن تكون المعاني التي يتضمنها الغناء عفيفة وشريفة.
أما الموسيقى و الأغاني المحرمة: فهي التي تلهي عن ذكر الله تعالى وتتضمن أشياء منكرة ومحظورة مثل أن تكون باعثة على تحريك الغرائز والشهوات ويختلط فيها الرجال بالنساء أو يكون صوت المغني فيه تخنث وتكسر وإثارة للفتن وتسعى إلى تدمير الحياء والأخلاق.
تمت الإجابة بتاريخ 31/12/2005

05‏/09‏/2008

حمادة فى رمضان ......... حمادة بعد رمضان !!

***************************************************************************************

( كل عام وأنتم جميعا بخير والأمة الإسلامية كلها فى خير وسعادة بمناسبة قدوم شهر رمضان المعظم ، وطبعا من أهم الملاحظات التى نراها فى رمضان ، ذلك التغير الهائل الذى يحدث لكثير من المسلمين ، والشحنة الإيمانية الرائعة التى تظهر عندنا جميعا - وللأسف فى الغالب بتروح بعد أول تكبيرة فى العيد ! - ، وصديقنا حمادة الذى سنتناول برنامج يومه فى هذا الموضوع قد يعطيكم فكرة عن مقصدى ! )

****************************
أولا : حمادة فى رمضان :

الساعة 3 صباحا :  الاستيقاظ من النوم  مبكرا من أجل السحور .
4 صباحا : النزول للمسجد من أجل صلاة الفجر جماعة ، ثم الانتظار للشروق من أجل قراءة القرآن الكريم وسماع درس دينى وصلاة الضحى .
7 صباحا : الجلوس على النت من أجل تصفح المواقع الإسلامية ، وتحميل الدروس الدينية والقرآن الكريم ، وعمل شات مع الأصحاب من أجل التناقش فى أمور الدين وأحكام الصيام .
12 ظهرا : صلاة الظهر جماعة فى المسجد ومن ثم الجلوس فى المسجد لقراءة القرآن الكريم وبعض الكتب الدينية من مكتبة المسجد .
3 ونص عصرا : صلاة العصر فى المسجد جماعة ، ثم العودة للمنزل لمتابعة مسلسل تاريخى وبرنامج فتاوى إسلامية .
6 مساء : صلاة المغرب فى المسجد جماعة ، ثم الإفطار .
7 ونص : صلاة العشاء فى المسجد جماعة ، ثم التراويح ( 1.5 جزء ) ثم الجلوس لسماع درس العشاء الدينى .
11 مساء : النوم بدرى من أجل الاستيقاظ للسحور وصلاة الفجر .

*************************

ثانيا : حمادة أول يوم فى العيد ! :

من الساعة 12 منتصف الليل إلى الساعة 6صباحا : السهر على النت من أجل مشاهدة الأفلام الثقافية ( لأن السرعة بتبقى بليل زي الصاروخ ! ) وتحميل أكبر قدر ممكن من هذه الأفلام لزوم الفرفشة مع الأصحاب فى العيد .
6 صباحا : الاغتسال ( وانتم عارفين ليه !! ) ثم تجهيز شنطة السفر للذهاب إلى شرم الشيخ مع الأصدقاء .
7 صباحا : النزول لصلاة العيد فى المسجد اللى جنب المطار عشان يتقابل هو وأصحابه ( مش عشان حاجة تانية )
8 صباحا : ركوب طائرة شرم الشيخ .
10 صباحا : الوصول إلى الفندق ووضع الحاجات فى الغرف من أجل بدء التهييص !
من 11 صباحا إلى 5 عصرا : قضاء وقت ممتع على الشاطئ ، والفرجة على المزز الرايحة والجاية على الشط ، واستغلال الزحمة على الشط من أجل القيام ببعض الأفعال الغير مشروعة من تحت لتحت ( تعبيرا عن الإعجاب بالسياحة والسياح ) ، وكذلك مقابلة شلة البت شوشو الجيرل فريند بتاعة حمادة وعمل بارتى صغير على الشط فى جو رقص وفرفشة وتهييس .
5عصرا إلى 11مساء : حبة نوم عشان يركزوا فى الروشنة بليل .
11 مساء إلى 2 صباحا : مشاهدة شوية أفلام ثقافى على اللاب توب بتاع حمادة ( من اللى كان حمادة سهر ينزلها طول الليل ) وضرب كام سيجارة بانجو ، على شمتين هيروين ، على تلات أربع حقن دراجز ، لزوم الصهللة طول الليل .
2 صباحا إلى 10 صباحا : الترويش فى الديسكو مع شلة شوشو ، فى جو ويسكى وشمبانيا ورقص و.. ، مع تطبيق ماتم مشاهدته أول الليل ( لأن شلة حمادة شلة أفعال مش أقوال وفرجة وبس ومعلش احنا لازم نطبق !! )

*************************

خاتمة : ( اللهم ارزقنا الثبات على حال رمضان طوال العام ، وأن تبعد عنا شر الفتن ماظهر منها ومابطن ، وأن تبعد عنا شر الفتور والملل ، وأن ترزقنا العزيمة والإرادة على مغالبة نفسنا ومجاهدة شهواتنا ، وأن توفقنا دائما لما تحب وترضاه ، ويارب مانبقاش زى حمادة ! )

*************************************************************************************



04‏/09‏/2008

أخبار النجوم فى رمضان !

^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^
1 : أكدت الراقصة الوقورة : سنية هز البطن ،على سعادتها البالغة بقدوم شهر رمضان الكريم ، وأكدت فى حديث صحفى أجراه معها الصحفى اللامع - الوقور- : عكارة فضايح ، الصحفى بمجلة نص كم الفنية الشهيرة أنها من أشد الراقصات تدينا فى تاريخ مصر ، ولذا فإنها ستقوم بعدد من الأعمال التى تدل على تدينها - الشديد - فى هذا الشهر الكريم ، وهذه الأعمال هي :
1: ارتداء بذلة الرقص المحتشمة طوال شهر رمضان ( البدلة مكونة من 4 قطع بحالهم : شبشب وكاب نظارة وأندروير ! )
2 : زيادة المساحة المغطاة بالملابس من جسمها طوال الشهر الكريم من 10 % فى غير رمضان إلى 16 % قبل الفطار و 12 % بعد الفطار .
3 : أكدت أنها ستحافظ على قراءة وردها من القرآن الكريم طوال رمضان قبل طلوعها على المسرح فى النادى الليلى الخاص بها .
4 : أكدت أنها ستتبرع من بنسبة 1.67 % من أرباح رقصها طوال رمضان فى دعم المشروعات الخيرية والدعوة للفضيلة ( كفالة أيتام - علاج مرضى محتاجين - بناء جامع - توزيع شرائط كاسيت وسيديهات تدعو البنات إلى ارتداء الحجاب ! .......الخ )

^^^^^^^^^^^^^^^^^^^^^^^^

2 : أكد المخرج القدير - الوقور أيضا - : تامر شخلعها ، أنه احتراما للشهر الكريم ، شهر رمضان العظيم ، فإنه سيقوم بعمل بعض التعدبلات فى إخراج فيلمه الجديد : أنا قطة مغمضة ، من بطولة الفنانة المحترمة الفاضلة سونيا مايوهات ، والفنان ميكى شمة ، وهذه التعديلات تتضمن الآتى :
1: إيقاف التصوير كل يوم ساعة صلاة التراويح ، من أجل أن يصليها طاقم العمل جماعة مع بعض !
2 :تقليل عدد القبلات فى الفيلم من 220 قبلة ، إلى 198 فحسب ( تخفيض 10% )
3 : تقليل عدد مشاهد الرقص والمشاهد الساخنة فى الفيلم من 82 مشهدا إلى 71 فقط وذلك احتراما لخصوصيات الشهر الكريم .

^^^^^^^^^^^^^^^^^^^^^^^^^

3 : أكدت الفنانة الشهيرة : لولو ألعوبان ، أن الذين قاموا بتصوير فيلم الفيديو الذى تم نشره مؤخرا ( والذى تظهر فيه وهى تخون زوجها - الراجل الطيب عبد الجبار الحنش - مع صديق عمره تامر لؤي ، والمكتوب عليه أن تم تصويره فى أول أيام رمضان قبل الفطار ) ، قد كذبوا وزوروا الحقائق ، وأعلنت بكل تأكيد أنه كان بعد الفطار ( لأنها مش معقول هتضيع صيام أول أيام رمضان عشان نزوة طائشة ) على حد قولها .
وقد أكد زوجها السيد عبد الجبار الحنش - بطل كمال الأجسام المعروف - أقوالها ، وقد أكد أيضا أنه قد سامحها على هذه الغلطة وذلك لأن ( رمضان شهر التسامح والحب ) على حد قوله ، وأضافت الفنانة القديرة أنها حلفت لزوجها وقالت ( وغلاوة بنشك وبايسيبسك وماجنسك ياروحى مش هكرر الغلتة الفزيعة ديه تانى!! ) .


وإلى هنا تنتهى نشرة أخبار النجوم ، وإلى اللقاء مع نشرة أخرى !!
^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^^

02‏/09‏/2008

صفاء النفس

ياصفاء النفس ياأسمى المعالى
ياصفاء النفس يا حلم الخيال ِ
يا طبيبا قد عهدنا الخير منه
شافي النفس من أليم اعتـلال ِ
أي حزن ٍ و اكتئاب ٍ سوف يأتى
بينما النفس فى صفاء الكمال ِ !؟
حلقى يا نفس فى أعلى فضاء ٍ
أنت ِ عما يقلق الناس فى انشغال ِ
أنت ِ أصفى من سماء ٍ فى ربيع ٍ
أنت ِ أنقى من سحاب ٍ فى الأعالى
لاتعودى لاكتئاب ٍ واستغلى
كل لمح ٍ من صفاء ٍ لا تبـــــــالى
واسعدى فالحق فى أن تسعدى
واستريحى عن هموم فى الليالى

01‏/09‏/2008

صلاة التراويح !

طبعا صلاة التراويح من أهم الطقوس الإسلامية التى نحرص عليها جميعا فى شهر رمضان ، إلا أنا نجد تباينا واضحا بين المسلمين وكذلك بين المساجد فى صلاة التراويح ، سواء فى الوقت الذى تستغرقه أو عدد الركعات أو الكم الذى يتم قراءته فيها ، وسأحاول توضيح أحد مظاهر هذا فيما يلى ! :

أولا : مسجد شهداء التراويح ( سمى بهذا الاسم لأن عددا كبيرا من المصلين يتوفاهم الله أثناء الصلاة لأن قلوبهم ضعيفة وإيمانهم هش فمابيستحملوش الإطالة - الخفيفة جددددددددددا - فى الصلاة ! ) :
وقد بلغ عدد الشهداء أعلى معدلاته فى رمضان الماضى - 1064 شهيدا - إيمانهم ضعيف بقى الله يسامحهم ، والحوارالتالى سيوضح لنا الصورة جيدا حول مايحدث بالضبط فى هذا المسجد - الحوار دار يوم 30 رمضان -:.
الشاب على المتزمت ( زعيم جماعة تشدد بلا حدود من أجل النصر الموعود ) : ماهذا الكفر يامولانا ؟!! ، بل ماهذه الفاحشة التى ارتكبناها ؟!!سندخل جهنم وبئس المصير ! ، إننا فى الحميم .. إننا فى الجحيم .. إننا فى العذاب الأليم .. .
إمام المسجد : لماذا يابنى ، لقد سمعت كلامك تماما وقمت بإطالة لحيتى حتى لامست الأرض ، وقصرت جلبابى مترين حتى لا تحل علينا اللعنة كما طلبت منى تماما ، وهذا العام - ولله الحمد - كان عدد الشهداء وفيرا فماذا أغضبك ؟
الشاب على المتزمت : كيف سولت لك نفسك أيها الشسخ الفاسق أن تختم بنا القرآن الكريم 162 مرة فقط فى صلاة التراويح هذا العام ، مع أننا العام الفائت قد ختمناه 163مرة ، إن هذا يعنى بكل وضوح أننا ارتددنا هذا العام عن الصراط القويم ، وضللنا عن سبيل الله ، وغرتنا الحياة الدنيا وأفسدتنا ، والله تعالى يقول :( فاقتلوا أنفسكم ذلكم خير لكم عند بارئكم فتاب عليكم ) ، وهنا فجر على الحزام الناسف الذى كان يرتديه ( كانا هذين الشهيدين رقم 1063 و 1064 ) !! .

ثانيا : مسجد الشيخ تامر :
المسجد الحاصل على 136 جائزة محلية ودولية فى سرعة الصلاة ، وكسر كل الأرقام القياسية فى هذا المجال ، وأشهر هذه الجوائز هى جائزة : need for speed أسرع مسجد فى مجرة درب التبانة ، وجائزة الإعجاز فى الإنجاز ، وجائزة أروش مسجد مقدمة من جمعية الشباب اللذيذ ، وللتعرف على سر تفوق هذا المسجد ، فلنستمع إلى الحوار الآتى بين اثنين من الشباب المواظبين على الصلاة فى هذا المسجد - الحوار فى 30 رمضان برضه -:
سيكو : يااااااااااي ، آه يانى ، الحقينى يامامى ، بجد الحقينى يامامى من الإمام ده .
سنسن : وااااااااء واااااااااء ، شفت الإمام المتوحش عمل فينا ايه النهاردة فى الصلاة ! ، المجرم خلص سورة الفلق فى الـ 8 ركعات ، وغلاوة كلبى بوبى ، لأشكيه لوزارة الإمامين ، وأجيبله الضابط يربيه .
سيكو : آآآآآه يارجلى اللى بازت من الوقفة النهارده ، مش هعرف ألعب مع قطتى بوسى الجميلة كده النهارده ، ومش هعرف أضرب معاكم بانجو فى العيد بكرة .
سنسن : آه صحيح كل سنة وانت طيب يامان ، وأنا كمان العيد هيضيع عليا ومش هعرف أرقص مع سونيا وهايدى فى الديسكو بكره ، يعنى الإمام الهمجى ده حرمنا من متعة العيد ، يارب دايقه يارب .
سيكو : آمين يارب !! .