04‏/03‏/2009

ليه البنات معلمين على الصبيان فى كلية الطب وبيطلعوا عليهم أوائل ؟!!


طبعا أكيد الكل ملاحظين الظاهرة الغريبة الموجودة فى معظم كليات القمة - وعلى رأسها كلية الطب طبعا - وهى ظاهرة إن عدد البنات ضعف عدد الصبيان ، وفوق كده ، تلاقى العشرين الأوائل على الدفعة منهم بتاع 14 أو 15 بنات ( وطبعا -اللهم لاحسد - الأولى بتبقى بنت أكيد ) !! بس لعلمك الظاهرة ديه مش غريبة ولا حاجة ، والدليل هوريهولك دلوقت على هيئة حوارين منفصلين ، الحوار الأول بين بنتين فى كلية الطب مهتمين ( شوية ) بالمذاكرة ، والحوار التانى بين اتنين شباب عاديين فى كلية الطب ، وشوف الفارق ، وإن شاء الله هتعرف البنات ليه بيعلموا علينا فى النتيجة ، وهتعرف كمان إن فيه اختلافات طبيعية ضدنا لمصلحتهم بتساعدهم على كده !! .
الحوار الأولانى : بين فلانة وعلانة !
فلانة : ازيك ياعلانة ، أما أنا امبارح كنت مكتئبة اكتئاب ما شوفتش زيه قبل كده ! علانة : ليه كفى الله الشر ؟!! ، ده أنا حتى كنت فرحانه أوى امبارح ، لأنى أخيرا خلصت تنزيل الفيديوهات اللى عاوزاها من النت .
فلانة : امبارح كنت تعبانة أوى ، لدرجة إنى معرفتش أذاكر غير 8 ساعات بس !! . علانة : ليه ؟؟!!!!!!! انتى بتستهبلى ولا ايه !!!!!!!!! ، انتى مش واخدة بالك إن الامتحان ناقص عليه 5 شهور بس إن شاء الله ؟!! ، الصراحة انتى كدة بتتدلعى أوى !! هو احنا بنعمل ايه فى حياتنا أحسن من المذاكرة ؟؟؟؟!!!!!!!!!
فلانة : على قولك !! بس والله غصب عنى ! ، أنا رجعت من الكلية تعبانة فنمت على الكنبة ساااااااااااااااعة إلا ربع ، وبعدها قمت من النوم مكتئبة عشان الوقت اللى ضاع ، فلقيت نفسى مفتوحة على التلفزيون ، فرحت شفت حلقة من مسلسل أجنبى عشان أفك شوية !
علانة : ياااااا راااااايقة !! ، بتضيعى الوقت ده كله ! ، إمال لو كنا فى أول السنة كنتى عملتى ايه ، طب ماانتى عندك الأجازة ابقى اتفرجى فيها على التليفزيون شوية وانتى بتحضرى مناهج السنة الجديدة بإذن الله ، لكن دلوقت ما ينفعش الدلع ده !
فلانة : خلاص والنبى لحسن أنا مش ناقصة ندم ! ده أنا كنت مقطعة نفسى من العياط امبارح على الوقت اللى ضاع !!!!!!!!! ، آه صحيح ، هو انتى كنتى بتنزلى ايه من النت ؟!
علانة : دول 12 جيجا فيديوهات طبية ع الماشى كده نزلتهم من موقع طبى أجنبى فى الباثولوجى ، أصلى بعد ما خلصت الكتاب لقيت نفسى مش واخدة فكرة كاملة أوى عن المادة فكنت عاوزة أنمى معلوماتى شوية فى الموضوع ، والحمد لله شفت نصهم امبارح !!
فلانة : أوكى ، طب انا هجيبلك الفلاشة بتاعتى عشان تديهوملى وبالمرة تاخدى الـــ 10 جيجا فارما اللى أنا نزلتهم من النت .
علانة : أوكى ، يالا بينا بسرعة نروح المدرج لأن المحاضرة يدوب ناقص عليها نص ساعة ، عشان نلحق مكان قدام ونلحق نراجع محاضرة المرة اللى فاتت ، ونحضر المحاضرة الجيدة .

فلانة : اوكى ، يالا بينا .

الحوار التانى : فلان وعلان !
فلان : ازيك يله !!!!!!!!!! ، باركلى !!!!!!!!!!!! ، الدنيا مش سايعانى ! ، أخيرا فتحت كتاب الميكرو !!!!!!!!
علان : ألف مبروك يا دحيح !!!! ، والله وعرفنا سكة الدح أهوه ، وتلاقيك قعدت تقرأ فيه ساعتين تلاتة كمان !

فلان : الحمد لله ياعم ، أصل مكانش ينفع أتنينى بطيخة فى الميكرو على طول ، ده الامتحان ناقص عليه شهر ونص .
علان : ماشى يا عم مين قدك ، أنا بقى امبارح كنت بفتح كام برانش كده فى الفارما مكنتش فتحتهم قبل كده .
فلان : ايه ده !! ، وأنا اللى كنت مكسوف من نفسى إنى هبقى الوحيد الدحيح اللى فى الشلة !!
علان : فكك من الحوار الخنيق ده ، وتعالى نروح المدرج ، المحاضرة عدى منها ساعة إلا ربع .

فلان : ياعم فكك انت ، الصراحة مش طالبة معايا أحضر محاضرات النهاردة ، أنا كنت امبارح سهران لحد الفجر على النت ، فنمتش كويس وتعبان ، أنا أروح الكافتيريا أقعد شوية أحسن ، ولا أتمشى حبة تحت الكوبرى لحد ما أفوق !
علان : انت حر ، أنا هخلص المحاضرة وأجيلك نروش شوية تحت الكوبرى ، لحسن الساعتين ونص مذاكرة اللى أنا ذاكرتهم امبارح خنقونى ع الآخر .
فلان : طب طالما انت دحيح كده ! احضر المحاضرتين التانيين كمان . علان : لا ياعم ، أنا آخرى محاضرة فى اليوم ، ناقص تقولى أحضر السكشن كمان ! ، وماتنساش إنى عندى كورسين النهاردة . فلان : بس ده فيه غياب ! وبيقولوا عليه درجات !! .
علان : يعنى هى جات على 10 والا 15 درجة بتوع الغياب ، يا عم نفض !!! مش ناقصة خنقة ! ، ألا قوللى شفت مطشات الدورى الأسبانى امبارح بليل ، بيقولوا برشلونة خسر فى ملعبه !
فلان : أيوة خسر اتنين واحد ونزل المركز التانى ، بس أنا ما شفتش المطش عشان كان عندى جيم امبارح ! الواحد حاس إنه تخن وعضلاته فيصت من كترة القعدة قدام الكتاب اليومين دول ! ، ولما روحت لقيت برنامج سياسى فاجر ع الجزيرة فقعدت أشوفه .
علان : طب مقلتليش أجى معاك ليه ؟؟!!!!!،ولو إنى كنت مشغول بالللعبة الجديدة اللى نزلتها من النت ، حتة لعبة فاجرة ، قعدت ألعبها امبارح 4 ساعات ، فيها شوية حروب ومعارك جامدة ! ديه مساحتها 14 جيجا ، بس تستاهل !
فلان : ميه ميه ، هاخدها منك ، ألا صحيح ، أخبارشلة صيدلة
ايه ؟! علان : كانوا مأجرين ملعب المدرسة اللى جنب بيتهم ولعبوا امبارح 3 ساعات كورة ، ما انت عارف إنهم بيحبوها مووووووت ، أصلهم برضه يعينى كانوا بيدحوا طول الأسبوع ده أصلهم مطحونين امتحانات اليومين دول !!
فلان : ربنا يوفقنا ويوفقهم ، وأنا هبقى ألعب معاهم المرة الجاية إن شاء الله .
علان : وأنا معاك إن شاء الله ...........سلام بقى عشان المحاضرة ناقص فيها 5 دقائق ، يدوب ألحق أسأل أي حد من الدحيحة هما خدوا لغاية فين ، وهجيلك تحت الكوبرى .
فلان : أوكى ، سلام يامان .
علان : سلام .

***************************
أظنكم فهمتم دلوقتى الموضوع ماشى إزاى ! ، بالذات لما تعرفوا إن المجموع عندنا فى كلية الطب بيعتمد بنسبة 80 فى المائة على كترة الحفظ والمذاكرة ورص الكلام أكتر من الاعتماد على تشغيل الدماغ والذكاء ، وبالتالى هتذاكر أكتر تجيب مجموع أكتر ( فى الغالب يعنى ، لأن اللى ما بيعرفش يميز فى الحفظ بين المهم والمش مهم بيضيع مهما ذاكر وهو ده الجزء الوحيد فى الموضوع اللى معتمد على الذكاء ) ، وبالتالى فالميزان مايل لكفة البنات خالص ، خصوصا إن (أغلبهن ) كل حياتهن
بتدور حوالين المذاكرة والمحاضرات والسكاشن والكورسات والقعدة على الكتب ، أما الصبيان فعندهم الكورة ( لعب وفرجة ) والكمبيوتر ( أكتر من البنات طبعا ) والخروج مع الشلة ، والسياسة والأخبار ( ما تقوليش إنك تعرف بنت ولا اتنين بيشوفوا الجزيرة ، لإن كل قاعدة وليها استثناء ، وانت عارف أكتر منى إن معظم البنات آخرهم يشوفوا مسلسل نور !! ) ، ده غير الملل والزهق بسرعة من المذاكرة ( أما البنات تحس إن عندهم هرمون الدحين اللى بيديهم الطاقة الرهيبة على القعدة على الكتاب أكتر وأكتر مكن غير ملل ) ، وغيره وغيره من المشاغل ( اللى واضح إن كتير منها مهم ومش كلها تافه عشان ننتقد الصبيان إنهم بيعملوها ، أنا مثلا حافظ القرآن الكريم الحمد لله كله ، وبالعافية بلاقى وقت أراجعه فيه ، ولو استسلمت للدح وما راجعتش ، يبقى يا رحمن يا رحيم ع الحفظ ، وكله هيطير يا معلم ! ، وكمان لو مكنتش ألعب كورة ورياضة هتخن وأبقى زى الفيل وده اللى بيحصلى فى فترة الامتحانات ، ولو ما شفتش التلفزيون والنت مش هعرف حاجة فى الدنيا ، ولو مكنتش هلعب شوية وأرفه هكره نفسى وهزهق من حياتى !! ، ده غير إنى بحب القراءة ، وعاوز أزور قرايبى ومعارفى و ..و.. و.. ) . وفى النهاية ، ربنا يعين الغلابة ويوفقهم !!!!!!!!!! .