رغم الفرقة الواضحة بين البلدان العربية ، واتفاق حكامها الأوغاد فى عصر ما قبل الثورات ، على ألا يتفقوا على الخير أبدا .... فإن هناك صفات كثيرة تجمعهم بجانب الفساد والاستبداد و كل الصفات الشريرة اللى انتم عارفينها ... إنها صفة الغباء !
بمنتهى الصدق ، أنا أصاب بالاشمئزاز من غباء الحكام العرب ، وكلما رأيت أحدهم على شاشة التلفاز ، أو اقتحمت مخيلتى صورة أحدهم ، أو أي شئ يتعلق به .. ( صوته - خطاباته - هزاره وخفة ظل اللى جابوه - ضربته الجوية إن وجدت - كرشة المترهل فى أغلب الأحوال - ملاياته و جماهيريته وتوكتوكه - مذيعات التلفزيون الحكومي بتوعه - ..... الخ ) ، فإننى أشعر بغثيان لا حد له ، وأشعر أننى إذا استسلمت إلى هذا الغثيان ، فعلى العالم أن يتحمل تسونامى عنيف ومدمر من الطـ ....... الـ vomiting !
وفى مقام الحديث عن غباء الحكام العرب ، نجد فى صدارة المشهد حاليا عبقرية اليمن السعيد ذو العمر المديد ، والسلطان المجيد ، و الدماغ الشديد ، والصوت الفريد ... الواطي الطالح عبد السلطة والهائم فى حب الكرسى ، والمسمي - خطأ - : على عبد الله صالح . وهو مستعد لتدمير بلده وإدخاله فى الفوضى والحرب الداخلية و تفتيت جيشه ، وذلك لخوفه أن يتنحى استجابة للجماهير الثائرة قبل أن يسلم السلطة لايد أمينة ! ............ حد يدور على أمينة ويجيبها يا جماعة .. خلونا نخلص بقى ! .
ولابد فى البداية أن نحيى أبطال اليمن العظام ، القابضين على جمر ثورتهم الباسلة لشهرين أو يزيد حتى الآن ، الدافعين فاتورة الحرية من دمائهم الزكية فى كل يوم ، والصابرين على تعنت نظامهم الحاكم وغباء رئيسه و تباتة وزير دفاعه ذى الكرش المتين الـ " وفى للقسم الذى أقسمه أمام الله والوطن بالولاء للقيادة السياسية " ... الراجل يا حبة عينى فى وضع حرج ! ، يعنى يقف مع شعبه و يقلد جيش مصر وتونس ، ويبقى إمــَّــــعة ؟؟؟ ينفع كده ؟؟!! .... وعايزينه يحنث بالقسم اللى أقسمه أمام الله والوطن بإنه يساند القيادة السياسية الفاسدة اللى دمرت اليمن و أفقرت شعبه وأقفرت جـِنانه و أنهكته فى حروب الداخل والخارج ؟؟؟؟ ..... أليس منكم رجل رشيد ؟؟ ، عايزين الراجل يغضب ربنا ؟؟؟؟؟؟!!!!!!!!
مشكلة مخلوع اليمن ( مخلوع هنا ذكرتها على اعتبار ما سيكون بإذن الله الواحد الأحد قريبا ) ، أنه يظن نفسه " واد فـِـتـِـك " وإنه " دماغ " وإنه " قارش الفولة " ، وإنه " اللى هيجيب التايهة " ... ببساطة هو فاكر نفسه أذكى من زعيم الاستبداد العربي وبقرته الضاحكة .. مبارك ! . وأنه سيستفيد من دروس فشل الطغاة الآخرين من الأجل التشبث بالكرسى الحبيب أكثر وأكثر .... والأدلة على هذا الاعتقاد كثيرة ، ومنها مثلا :
1- مش اعتصام ميدان التحرير فى العاصمة القاهرة كان له الفضل الأكبر فى الإطاحة بمبارك ؟؟؟؟ ...... هنا تفتـَّـقت دماغ عِلوة عن فكرة عبقرية فتاكة ، وضعها حيز التنفيذ بمجرد أن أحس أن شعبه ناويله على ثورة ............ احتل ميدان التحرير اللى فى العاصمة صنعاء برجالته وبلاطجته ( مفرد بلطجى اللى جمعها بلطجية بالمصري ) و شباب حزبه ! ..... هييييييييييييه الثورة فشلت قبل ما تبدأ .. فشلت .... فشلت ... فشلت ... فشاااااااااااااااااليييييييييييييييييييييييييييييييييييت ............................ أوبس ! ..... الثوار اعتصموا فى ميدان التغيير اللى قدام جامعة صنعاء ! .... عااااااااااااااااااااااااااااااااااااااااااااااااااااا .
2- مش رجالة مبارك جربوا الخيل والبغال والحمير والجمال فى حركة غير تقليدية لإجهاض اعتصام الثوار فى التحرير وما نفعش ؟؟؟ ، عــِــلوه بقى له نظرية .... إن الفعل التقليدى فى المناخ الغير تقليدى يكون غير تقليدي ! ...... ببساطة الراجل بعت قناصة يخلصوا الموضوع ! ، وقتل بتاع 50 ، 60 واحد ...... هييييييييييييييييييييه .. هيييييييييييييييييه .. الثوار هيجروا .. الثوار هيكـُــتـُّـوا .. الثوار هـ .......... أوبس ! ...... الثوار زادوا إصرار ، وتعاطفت معهم قبائل تانية لما اتقتل ناس منها فى الميدان ! ... عااااااااااااااااااااااااااااااااااااا
وهنا خرج عـِــلوة بتصريح من العيار المحرم دوليا من نوعية الغباء العابر للقارات والمفجر للـ ...... مرارات يؤكد فيه استنكاره واستهجانه لضرب المتظاهرين الأبرياء الذين رغم كونهم ينفذون أجندات أجنبية و يقبضون الأموال من المتآمرين فى كافة أنحاء المجرة و رغم كونهم أغبياء ومتبطرين على النعمة اللى هما فيها ، إلا أنهم يظلون أبرياء وكويسين ، وأكد علوة أن : أهالى البيوت المحيطة بمنطقة الاعتصام هم الذين استأجروا قناصة لضرب المتظاهرين بسبب ضيقهم من الإزعاج المستمر لهم نتيجة استمرار الاعتصام !! ///// الناس عايزة تـِــقـيـِّــل يا جماعة شوية ، بلا ثورة بلا دياولو ! ......................... آه يا ... مرارتى .
3- ديه بقى حتة لولبية ! ... مش المجلس الأعلى العسكري فى مصر لبـِّـس مبارك الجلابية واجتمع من غيره وده كان إشارة إنهم خلاص انحازوا للثورة وادوله البراءة ؟؟؟؟؟ ..... عــِـلوة بقى بفكره اللى سابق لسنه ، وعبقريته المخترقة لأستار المستقبل ، بسرعة اجتمع بنفسه مع المجلس العسكري بمجرد ما شم خبر بداية انضمام بعض قادة الجيش للثوار ، وطلع أنتيمه وزير الدفاع على التلفزيون اليمنى ، يؤكد ولائه لله وللوطن و .... للقيادة السياسية " الفاسدة " !!!
الأدلة كتيرة ... والغباء مستمر ، والرجل محتاج عملية جراحية عسيرة لفصله عن الكرسي الحبيب اللى لازق فى جتته 34 سنة لغاية دلوقت ............. والناس هناك شغالين جُمَع على ودنه ! ، ولولا الملامة كانوا عملوله جمعتين تلاتة فى الأسبوع ، الناس عملوا جمعة صمود وجمعة غضب و جمعة كرامة و جمعة شهداء وجمعة تحدى وجمعة زحف وجمعة رحيل ....... أعتقد لو استمر فى مماطلته و برود دمه ، الشعب هناك هيفقد أعصابه وهنلاقى : جمعة ارحل يا " تيييييييييييييييييت " / جمعة ارحل يا روح أمك / جمعة ارحل يا بارد يا تييييييييييييت / جمعة " ........... " صوت غير برئ يدل على الغضب والاستهجان ! / جمعة هنجيلك القصر نطلع " تييييييييييييييييييييييت " ....... الخ .
ربنا يحفظ اليمن وأهله ، ويخلصنا من غباء عــِــلوة وأمثاله بأقل التكاليف ، ويقوي مرارتنا على التحمل ، لإن من الواضح إننا لسه هنشوف من ده كتير .
وبالطبع مسلسل الغباء الدرامي لحكامنا العرب لا تجف ينابيعه و لا ينضب معينه ( لذيذة أوي الفصحى ديه بعد العامية اللى فوق ) .
ولنا لقاء قريب بإذن الله مع غباءات جديدة لحكامنا العرب .
ليست هناك تعليقات:
إرسال تعليق