المساجد وحرامية الجزم !

الصراحة أنا مش عارف أعبر عن الغيظ اللى أنا شعرت بيه لما اتسرقت جزمة واحد من المصلين فى صلاة التراويح ، بجد أنا اتضايقت جدا لأن الحرامى - مهما كان فقير - ما عملش احترام لبيت الله ، ولا لشهر رمضان الكريم ، وكثرة السرقات اللى زي ديه للأسف إشارة مرعبة إلى ما فعله الفقر بناس كتير لدرجة تضطرهم ينتهكوا حرمة بيت الله أطهر مكان فى أطهر شهر ، ويسرقوا حاجة إخوانهم المسلمين أثناء الصلاة ، فربنا يستر !! ، المهم أنا فكرت فى كام طريقة - بسيطة جدا جدا جدا - للتغلب على هذه الظاهرة ، وتوصلت بالفعل لــ 10 طرق هعرضها عليكم وياريت لو حد عنده طرق حلوة تانى يقوللى ! ، والطرق هى :

@@@@@@@@@@@@@@@@@@@@@@@@@@@@@@@@@@@@@@@@@@@@@

1 : أن تضع حذاءك جنب أي حذاء غالى وملفت للنظر بحيث الحرامى ينجذب ليه ويسيب جزمتك !1 ( أما لو الحرامي قرر ياخد الاتنين فعليكبالطرق التانية ! ) .

2 : أن تربط فى حذاءك خيط رفيع جدا - و فى نفس الوقت قوي - ، لا يكاد يرى بالعين المجردة وتربط طرف الخيط التانى فى نفسك ، بحيث إذا الحرامى حب ياخد الجزمة ، تحس انت علطول وتروح تطحنه و تولع فيه ، لكن يعيب الطريقة ديه إنها هتسبب إن باقى المصلين هيصابوا بكسور وكدمات من كترة الكعبلة فى اليلك ، ويمكن سيادتك تبقى زيهم لو واحد مليان شوية اكعبل فى الخيط !

3 : أن تضع فى حذاءك جهاز تتبع ، ويكون معك رادار يظهر عليه مكان الحذاء ( عن طريق جهاز التتبع ) بحيث إذا تغيرت إحداثيات موقع الجزمة ، فالجهاز هيدى إنذار ينبهك إن الجزمة اتحركت و يحددلك مكانها فين ! ( التكلفة بسيطة جدا بتاع 30.000 دولار ! )

4 : إنك تضع جهاز تتبع برضه ، بس المره ديه يكون متصل بمدفع ليزري بيدور فى الفضاء حوالين الأرض ، ويكون مزود بمعلومات دقيقة عن شكل الحذاء ومقاسه وكل حاجة  عنه وعن سيادتك ، ولما توصل إشارة للمدفع إن شخص غريب هو اللى لابس الجهاز ، هيقوم المدفع بضربه بأشعته ويحوله لرماد من غير مايصيب الجزمة لأي ضرر !! ( الطريقة ديه مكلفة حبتين ، وعيبها إنها عنيفة إلى حد ما )

5 : تؤجر بودى جارد يحرسلك الشوز بتاع سيادتك على ماتخلص صلاه ، بس الخوف إنه هو نفسه يطلع حرامى !

6 : إنك تعمل حوالين الجزمة مجال كهرومغناطيسى  قوى يمنع أي حد - ولو الجن الأزرق والبمبى - من الاقتراب من الجزمة ، والجهاز اللى هيعمل المجال ده هيعمله بتاع 2 ولا 3 مليون بس !!( بس كله يهون فى سبيل الحفاظ على جزمتك ! )

7 : إنك توصل الجزمة بقنبلة غاز يسبب فقدان الوعى ، والقنبلة متصلة بحاسوب دقيق مزود ببياناتك ، فلما يحس إن شخص غيرك هى اللى ماسك الجزمة ، هيفجر القنبلة ، فالحرامى يفقد الوعى !

8 : إنك تطلى حذاءك بالمادة اللى أمريكا داهنه بيها المقاتلات الشبح عشان تختفى عن الرادار ، وتيلط على الجزمة ضوء قوى ، هيتفاعل مع الماده ديه ، فيخفى الجزمة فالحرامى مايشوفهاش ( وديه الطريقة اللى أنا بفضلها !! )

9 : إنك تركز كاميرا على الجزمة ، والكاميرا مزودة بشاشة عرض محطوطة فى الجدار اللى فى وشك فى المسجد ، بحيث لو حد قرب من الجزمة تشوفه وتعمل اللازم .

10 : طريقة عبقرية جدا ، جاتلى بعد تفكير أيام ................ إنك تحط الجزمة بتاعتك قدامك فما حدش يقدر ياخدها !! .

@@@@@@@@@@@@@@@@@@@@@@@@@@@@@@@@@@@@@@@@@@@@@