بالطبع أهدى هذه القصيدة إلى الغير مرحوم بإذن الله جهاز مباحث أمن " قمع " و " تطليع دين " الدولة .
وأعتذر إلى العباقرة الذين أنتجوا أغنية " صوت الحرية بينادى فى كل شارع فى بلادى ".
نصيحة : للمزيد من الإحساس بالقصيدة ، استحضر نغمة وألحان نشيد " صوت الحرية بينادى " ! .
القصيدة بعنوان : رباعيات أمن الدولة .
فى كل شارع فى بلادى
كل الوثائق بتنادى
الحق يا عـمر انت وشادى
واقروا الفضايح يا ولادى !
***************
والحاضر هيقول للغايبْ
الدنيا يا ناس فيها مصايبْ !
قاضى ومهندس أو طالبْ
الكل هناك كان متراقبْ !
***************
" أمن الدولة " فى اسمه غلطة
كلمة زيادة ملهاش لازمة
شيل كلمة " أمن " من الجملة
" أمن الدولة " هو " الدولة "
***************
لو حاسس يا ابنى إنك سادي
سلخ الناس عندك شئ عادى
" أمن الدولة " عليك هينادى
العب يا كابتن فى ستادى !
***************
والله وجـِـه يومك يا ظالمنا
احنا خلاص م القهر خلصنا
وحصار روحنا منكو بخوفنا
راح .. دلوقتِ جت أيامنا
***************
لما جرينا دخلنا المبنى
والورق المفروم قدامنا
اتعصَّـبنا بشدة .. صرخنا
ضاعت يا أمـّــا كل حقوقنا
***************
لكن ربك ما يسيب ناسه
وعلى الظالم ينزل باسُـه
فلقينا وثائق محفوظة
هتدينه من ساسه لراسُه
***************
بس اللى يخليك تستعجبْ
ويخليك قرنين مستغربْ
أوراق منها الطفل اتشـَـيـِّـبْ !
يبقى المفروم أغرب وأغربْ !
**************
دول عالم فاجرة يا اخواتى
أفجر من إبليس وحياتى
كانوا بيراقبوا الشعب يوماتى
حتى حماده وعبده الحاتى !
***************
ديه وثائق جابت من الآخر
وانكشف الجمع المـُـتـآمر
" أمن الدولة " علينا كان قادر
فى حياتنا الناهي والآمـِـر
****************
بس احنا بجد قد احترنا
نقرأ كلها أو نستنى
ديه بلاوي هتطول كل رموزنا !
والكل هيسقط فى نظرنا
**************
ضباط أمن الدولة الواطي
خلوا الشعب المصري يطاطى
لكن ربك زال سلطانهم
سبحان المانع و العاطى
***************
دول حبة عين روحى وقلبى !
وبجـِـزّ سنانى أنا من حبى !
نفسى ألاعبهم ماتشين رُجبى
ويغنـُّـولى " الحلم العربى " !
***************
جواسيسنا فى كل مكان
هرسوا رجال الأوطان
القمع .. النفخ .. التيييييييييت
رسالتنا فى كل زمان !
*************
ايه رأيك دِلـوَجْ يا امبارك
مين فى الشعب المصري اختارك
أمن الدولة أعز رجالك
جه وقت عقابهم ... عقبالك
**************
أمريكا شكلها منا اتغموا
و إن شاالله هتقفل ( جوانتنامو )
مين هيعذب معتقلينها ؟؟
شركائها فى مصر بيتلمّوا
!
***************
أنا م الآخر شمتان فيهم
وعلى قفاهم نفسى أديهم
مالهمش مكان بعد الثورة
م الوطن الحر هننفيهم
*************
هناك تعليق واحد:
كلام زي الفل..........المختصر المفيد من الاخر كدة
ابدعت يا دكتور
إرسال تعليق