الأولة باسم الله !

أولا وقبل أي شئ ،  أقول السلام عليكم  ورحمة الله وبركاته  ،  طبعا برحب بكل الزائرين  ( زار أو زأر  مش فارقة ! )  وإن شاء الله تستفيدوا  من  المدونة وتلا قوا  فيها حاجة كويسة ،  الصراحة أنا لما سمعت عن موضوع المدونات ده  أعجبت بيه جدا ،  وقررت  وعزمت إن أنا  أعمل مدونة أكتب فيها كل اللى يخطر على بالى ، وأحب الناس تشاركنى فى مناقشته وطرحه  ، خصوصا إنى بحب الكتابة فى كل حاجة  ، وأحب المناقشة  فى كل شئ ،  وأنا أحب فى كل حاجة  أنتهج منهج وسطى ، فمثلا لا هكتب بالعامية بس عشان الكل بيفهمها ، ولا الفصحى اللى المفروض الكل يكتب بيها ،  لازم أوسطن نفسى عشان الكل يستفيد بإذن الله  ، حتى اسم المدونة  مارضيتش أجيبه روش أوى عشان ماحدش يشك فيا ، بالذات الناس الكبار  ، يعنى لو كنت سميتها ( شباب مهيس  ،  الكلب لولو هو  ... ) كان ممكن تشتهر ، بس لو حد عرف فى البيت يبقى مش بايت فيه النهاردة !  وأكيد الناس المحترمة  هتدعى عليا  ! ويضريوا بيا المثل فى البوظان والانحراف  ،  ولو كنت سميتها اسم كلاسيك زي ( الشاب الجسور ،  المحترم الوقور ، أنا مؤدب ، سائر على درب الحرية .. )  كان الشباب هي .... هيزعلوا جامد  ، وكان هيقوموا بردود  أفعالهم ليست على درجة عالية  من الأدب والأخلاق  (مش محتاجين أقولكم على حاجة  لأنكم فاهمين )    فقلت أسميها أبو صلا ح وخلاص وحطيت حرف  أو  زيادة لزوم التميز !
على العموم مش هطول عليكم و أتمنى إن الموضوعات تعجبكم إن شاء الله ،  وربنا يوفقنا للخير بإذن الله  ، وياريت اللى  يبقى عنده أي نقد  يبعت ويقوللى ويرد على المواضيع ، و السلام عليكم ورحمة الله وبركاته .